எரிபொருள் விலை உயர்வு - ஐரோப்பாவில் விமானச் சேவைகள் குறைப்பு

விமான எரிபொருள் விலை கடுமையாக உயர்ந்ததால், ஐரோப்பாவில் 21 விமான நிறுவனங்கள் குளிர்காலத்துக்குத் திட்டமிட்டிருந்த இருக்கைகளின் எண்ணிக்கையை 5 சதவீதத்துக்கும் அதிகமாகக் குறைத்துள்ளன. சில வழித்தடங்களில் சேவைகள் ரத்தாகியுள்ள நிலையில், வரும் மாதங்களில் பயணக் கட்டணமும் உயரக்கூடும்.

போலந்தின் லாட் விமான நிறுவனம், கிராகோவிலிருந்து மாட்ரிட், ரோம், பார்சிலோனா ஆகிய நகரங்களுக்கு ஆண்டு முழுவதும் விமானங்களை இயக்கத் திட்டமிட்டிருந்தது. இப்போது அந்த மூன்று வழித்தடங்களிலும் குளிர்காலச் சேவையை நிறுத்தியுள்ளது. பிரிட்டனின் ஈஸிஜெட் நிறுவனம் குளிர்கால அட்டவணையில் சுமார் 14 லட்சம் இருக்கைகளைக் குறைத்துள்ளது. ரயன்ஏர் தனது ஆண்டு பயணிகள் இலக்கை 21.6 கோடியிலிருந்து 21.4 கோடியாகக் குறைத்துள்ளது.

யூரோ கன்ட்ரோல் அமைப்பின் தரவுப்படி, அக்டோபரில் ஐரோப்பாவில் விமான எரிபொருளின் சராசரி விலை ஒரு கேலனுக்கு 4.84 டாலராக இருந்தது. இது மத்திய கிழக்கு நெருக்கடிக்கு முந்தைய விலையைவிட 114 சதவீதம் அதிகம்.

 
விலை ஏற்றத்திலிருந்து தற்காத்துக்கொள்ள முன்கூட்டியே ஒப்பந்தங்கள் செய்திருந்த போதிலும், பிரிட்டிஷ் ஏர்வேஸின் தாய் நிறுவனமான ஐஏஜியின் மூன்றாம் காலாண்டு எரிபொருள் செலவு 30.4 சதவீதம் உயர்ந்தது. ஏர் பிரான்ஸ்–கேஎல்எம்முக்கு எரிபொருள் விலை உயர்வால் அதே காலாண்டில் 43.6 கோடி யூரோ கூடுதல் செலவு ஏற்பட்டது.
பிரிட்டிஷ் ஏர்வேஸ் தனது கூடுதல் எரிபொருள் செலவை இந்த ஆண்டில் முழுமையாகக் கட்டணத்தில் ஈடுகட்ட முடியும் என ஐஏஜி எதிர்பார்க்கிறது. ஆனால், போட்டி அதிகமுள்ள ஐரோப்பிய வழித்தடங்களில் அது சாத்தியமில்லை என அதன் தலைமைச் செயல் அதிகாரி லூயிஸ் கலேகோ தெரிவித்தார்.

 
இதற்கிடையே, அடுத்த 12 மாதங்களில் ஐரோப்பிய விமானக் கட்டணங்கள் 10 முதல் 20 சதவீதம் வரை உயரக்கூடும் என ரயன்ஏர் கணித்துள்ளது. ஒரு வழித்தடத்திலிருந்து ஒரு நிறுவனம் விலகியபோது, அங்கு கட்டணம் 9.7 சதவீதம் உயர்ந்ததாக ஆக்ஸெரா ஆய்வு தெரிவிக்கிறது.

செலவைக் கட்டுப்படுத்தும் நடவடிக்கைகள் ஊழியர்களையும் பாதிக்கின்றன. நெதர்லாந்தின் கேஎல்எம், வரும் ஆண்டுகளில் பணியாளர் எண்ணிக்கையைச் சுமார் 15 சதவீதம் குறைக்கத் திட்டமிட்டுள்ளது.

 
ஐரோப்பிய வழித்தடங்களில் புதிதாகச் சேர்க்கத் திட்டமிட்டிருந்த ஏர்பஸ் ஏ320 விமானங்களுக்குப் பதிலாக, குறைந்த இருக்கைகள் கொண்ட எம்ப்ரேயர் விமானங்களைப் பயன்படுத்தவும் முடிவு செய்துள்ளது. லாட்வியாவின் ஏர்பால்டிக் நிறுவனம் சுமார் 100 விமானிகளையும் 200 விமானப் பணியாளர்களையும் பணிநீக்கம் செய்யத் திட்டமிட்டுள்ளது.

•  பிரிட்டிஷ் ஏர்வேஸின் தாய் நிறுவனமான ஐஏஜியின் மூன்றாம் காலாண்டு எரிபொருள் செலவு 30.4 சதவீதம் உயர்ந்தது.
• அடுத்த 12 மாதங்களில் ஐரோப்பிய விமானக் கட்டணங்கள் 10 முதல் 20 சதவீதம் வரை உயரக்கூடும் என ரயன்ஏர் கணித்துள்ளது.
• நெதர்லாந்தின் கேஎல்எம், வரும் ஆண்டுகளில் பணியாளர் எண்ணிக்கையைச் சுமார் 15 சதவீதம் குறைக்கத் திட்டமிட்டுள்ளது.