6 நிறுவனங்களின் ஐபிஓவுக்கு செபி ஒப்புதல்

மகாநதி கோல்ஃபீல்ட்ஸ், வெரிடாஸ் ஃபைனான்ஸ் உள்ளிட்ட ஆறு நிறுவனங்கள் புதிய பங்கு வெளியீட்டை (ஐபிஓ) மேற்கொள்ள பங்குச் சந்தை ஒழுங்குமுறை அமைப்பான செபி ஒப்புதல் அளித்துள்ளது.

இந்த நிறுவனங்கள் ஜூலை முதல் செப்டம்பர் வரை வரைவு ஆவணங்களைத் தாக்கல் செய்தன. அக்டோபர் 15 முதல் நவம்பர் 4 வரை செபி ஒப்புதல் வழங்கியது. பங்கு வெளியீட்டுத் தேதியும் விலை வரம்பும் பின்னர் அறிவிக்கப்படும்.
கோல் இந்தியாவின் துணை நிறுவனமான மகாநதி கோல்ஃபீல்ட்ஸ் வெளியீட்டில், அதன் தாய் நிறுவனம் தன்னிடம் உள்ள 66.18 கோடி பங்குகள் வரை விற்கத் திட்டமிட்டுள்ளது.

விற்பனைத் தொகை முழுவதும் கோல் இந்தியாவுக்குச் செல்லும். ஒடிசாவில் முக்கியமாகச் செயல்படும் மகாநதி கோல்ஃபீல்ட்ஸ், 2025–26 நிதியாண்டில் 21.83 கோடி டன் நிலக்கரியை உற்பத்தி செய்தது.
சென்னையைச் சேர்ந்த வெரிடாஸ் ஃபைனான்ஸ், புதிய பங்குகள் மூலம் ரூ.900 கோடி திரட்டத் திட்டமிட்டுள்ளது. தற்போதைய பங்குதாரர்கள் 1.28 கோடி பங்குகள் வரை விற்க உள்ளனர்.

 புதிய பங்குகள் மூலம் கிடைக்கும் நிதியை மூலதனத்தை வலுப்படுத்தவும், கடன் வழங்கவும் நிறுவனம் பயன்படுத்தும். ஐபிஓவுக்கு முன் ரூ.180 கோடி வரை நிதி திரட்டினால், புதிய பங்கு வெளியீட்டுத் தொகை அதற்கேற்ப குறையும்.
ஆளில்லா சாதனங்களை உருவாக்கும் சாகர் டிஃபென்ஸ் இன்ஜினியரிங் நிறுவனத்தின் பங்கு வெளியீட்டு மதிப்பு சுமார் ரூ.3,000 கோடியாக இருக்கும் என மதிப்பிடப்பட்டுள்ளது.

 நிறுவனம் வரைவு ஆவணங்களை ரகசிய முறையில் தாக்கல் செய்ததால், வெளியீட்டின் முழு விவரங்கள் பின்னர் தெரியவரும்.
மருந்துத் தயாரிப்பு நிறுவனமான என்கியூப் எத்திக்கல்ஸ் வெளியீட்டில், தற்போதைய பங்குதாரர்கள் ரூ.3,000 கோடி மதிப்பிலான பங்குகளை விற்க உள்ளனர். 

நிறுவன மேம்பாட்டாளர் மெஹுல் ஷா ரூ.2,000 கோடிக்கும், ஃப்ரான்டியர் இன்வெஸ்ட்மென்ட் ஹோல்டிங்ஸ் ரூ.1,000 கோடிக்கும் பங்குகளை விற்கத் திட்டமிட்டுள்ளனர்.
தங்க நகைக் கடன் வழங்கும் ஐஎஃப்எல் ஃபைனான்ஸ், 3.55 கோடி புதிய பங்குகள் வரை வெளியிட உள்ளது. தற்போதைய பங்குதாரர்கள் 30 லட்சம் பங்குகள் வரை விற்க உள்ளனர். புதிய பங்குகள் மூலம் கிடைக்கும் நிதியை மூலதனத்தை வலுப்படுத்தவும், கடன் வழங்கவும் நிறுவனம் பயன்படுத்தும்.

அர்ஜுன் ஜுவல்லர்ஸ் புதிய பங்குகள் மூலம் ரூ.200 கோடி திரட்ட உள்ளது. தற்போதைய மற்றும் புதிதாகத் திறக்கவுள்ள விற்பனையகங்களுக்குத் தேவையான நகைகளை வாங்கவும், அன்றாடச் செலவுகளைச் சமாளிக்கவும் இந்த நிதியை நிறுவனம் பயன்படுத்தத் திட்டமிட்டுள்ளது.